Indian gimartilyo sa utangan

Usa ka Indian national nga tigpatanto og kuwarta ang nalandig sa tambalanan human nasuko ang iyang gipaninglan ug mikulata hinuon ug mi-martilyo niya pasado alas 6 sa gabii sa miaging adlaw sa Poloyapoy Extention Toledo city.

Segun sa report sa kapolisan ang biktima giilang si Satman Singh Kour, 26, ulitawo, temporaryong nagpuyo sa Ibo Toledo.

Ang gitumbok nga suspek mao si Vincent Itaw, 25, ulitawo, nagpuyo ra usab sa nahisgutang barangay.

Matud pa sa kapolisan ang biktima naningil sa suspek sa inutang nga kuwarta, apan nasuko hinuon kini ug gikalitan pagsukmag sa nawong si Kour nga miresulta sa lagom.

Wala pa matagbaw ang suspek sa iyang pagsukmag sa nawong nikuha pa kini og martilyo dayong hapak sa ulo sa biktima.

Apan walay suwerte ang suspek kay nadakpan kini sa mga polis gipangulohan ni SPO3 Rene Quiros nga mitubag sa alarma ug gibalhog sa bilanggoan, samtang ang biktima nga si Kour nagpatambal sa Toledo District Hospital.