Mandaue mo-host sa ika-12 nat'l crime prevention week

Ipahigayon sa Mandaue City Cultural and Sports Complex ang paglusad sa 12th National Crime Prevention Week karong Agosto 31 alang sa Central Visayas.

Kini ang gipahibawo ni Rene Burdeos, regional director sa Department of Interior and Local Government ug sa samang higayun chairman sa Regional Management and Coordinating Committee sa Central Visayas.

Subay sa Presidential Proclamation No. 461 nga gilagdaan niadtong Agosto 31, 1994, gideklarar ang unang semana sa buwan sa Septiyembre matag tuig nga National Crime Prevention Week.

Nunot niini, giawhag ni Burdeos ang mga opisyal sa tanang departamento, ahensiya sa nasudnong kagamhanan, lokal nga kagamhanan ug ang katawhan nga mosuporta sa mga kalihukan atol sa kasaulugan.

Ang kalihukan magsugod alas 9 sa buntag sa usa ka Thanksgiving Mass ug Motorcade una pa ang launching program nga matapos sa alas 11 sa buntag.

Isip host sa programa, giawhag ni Burdeos si Mayor Thadeo Ouano nga patambungon ang tanang opisyal sa syudad ug mga barangay, mga residente ug mga tinun-an sa elementarya ug haiskul.

"Their presence will heighten community awareness and appreciation of the importance and value of crime prevention and foster involvement and participation of the general public," nagkanayun si Burdeos.