Nanulong og sayaw giluba

Nanulong og sayaw nga usa ka batan-ong lalaki gikasuyaan ug nadunggaban sa miaging gabii sa Marcelo Fernan Bridge sa Pusok, Lapu-Lapu.

Ang biktima mao si Roberto Inoc, 19, ulitawo, taga dalan Pilapil sa barangay Umapad sa dakbayan sa Mandaue.

Ang nagdunggab ni Inoc mao ang laing batan-ong lalaki nga wala mailhi nga gituohang nagpuyo usab sa maong dapit.

Si PO2 Narciso Supelanas sa homicide section sa kapolisan sa maong dakbayan nga gikahinabi sa Banat News miingon nga kuyog ang biktima sa mga barkada niini sa maong dapit.

Matud pa niya nga nanulong kini og sayaw sa maong dapit ug giingon wala magpalupig sa gikasakbang nila sa sayaw.

Dugang pa niya nga nagbarog ang biktima dihang kalit lang nga gihansakan ang dughan sa kutsilyo nga maoy nakaingon sa grabeng pagkaangol.

Dali nga gidala ang biktima sa Opon District Hospital apan gibalhin kini sa Vicente Sotto Memorial Medical Center sa dakbayan sa Sugbo.

Si PO2 Supelanas miingon nga nagpadayon karon ang ilang gihimong pakisusi sa pag-ila sa wala mailhing batan-ong lalaki nga nakadunggab niini.