Si Talisay City Engineer Audie Bacasmas mibutyag sa Banat News nga usa ka Guillermo Giralde ang miduol sa ilang buhatan para mo-apply og occupancy permit sa gipatukod niining edipisyo.
Usa sa rekisitos sa maong permit mao ang Approved Building Permit.
Si Giralde mipatukod sa iyang edipisyo niadtong Septiyembre 2001 ug pagka Enero 2002 ang target nga mahuman kini.
Si Bacasmas nahibulong dihang nakita niya ang kopya sa building permit ni Giralde diin aduna nay mga oras nga natala kabahin sa pagtrabaho sa proyekto.
Matud ni Bacasmas nga karon bag-o lang niya kining gipatuman ang maong pamaagi.
Ang pirma sa kanhi Acting City Engineer diha sa maong dokumento sukwahi kaayo kini sa mga pirma nga makita sa mga dokumento diha sa city engineering.
Nasuta ni Bacasmas nga usa ka peke ang maong building permit tungod kay wala kini record sa ilang buhatan dihang iya kining gipaukay.
Lakip si Giralde nahibulong usab sa maong insidente diin ang architect sa building nga iyang gipatukod maoy iyang gisangonan nga moproseso sa mga dokumento nga gikinahanglan.