Tulo gipamusil sa Carbon

Tulo ka tawo ang nangasamdan usa kanila 10 anyos nga bata atol sa nahitabong ginukdanay ug pagpamusil diha gikan sa dalan Calderon hangtud sa eskina sa Manalili sa Carbon Market sa Ermita ning dakbayan kagahapon sa udto.

Ang mga biktima giilang sila si Bilbixby Regner, 22, minyo ug residente sa Ubos-Puso, San Nicolas ning dakbayan kinsa negosyante og shellcraft, samtang naa sa talandugon nga kahimtang ang batang si Rodney Pardillo,10, taga Sudlon Dos ning dakbayan.

Naangol usab ang delivery man sa usa ka tindahan sa maong dapit nga si Felix Masong, 60, human kini matapsingi og bala diha sa tuong tiil.

Usa ka Alex "muslim" maoy gitumbok nga mipusil sa mga biktima ginamit ang usa ka kalibre 45 nga pistola.

Sumala pa ni PO3 Henry Orbiso sa Homicide Section sa pakighinabi sa Banat News nga kalit lang nga giduol sa suspek si Regner diha sa dalan Calderon ug gipusil apan nakadagan kini.

Ang suspek kinsa wala matagbaw migukod usab ug giusban og pusil si Regner hinungdan usab sa pagkapagan sa bata ug kang Masong nga diha sa giagian ni Regner.

Si Pardillo kasamtangang nagsukod-sukod sa tsinelas nga iyang gustong paliton dihang usa ka bala ang miigo diha sa iyang liog ug ang bala wala makalapos.

Usa ka polis sa Carbon nga off-duty nianang tungura nga si PO1 Allan Caumiran nga dunay gisusi sa Traveller's Lodge atbang sa gikahagbaan sa bata nakadungog sa buto-buto ug daling miresponde.

Matud pa sa maong polis nga iyang nakit-an si Regner nga nagdagan ug sa pagtuong suspek kini iya usab kining gigukod apan nahibulong nalang siya dihang nisukarap kini og kalit ngadto sa mga ukay-ukay.

Sa iyang pagsusi,duna kini daghang samad ug nagkadugo maong iya kining gidala sa tambalanan. Ang mga samaron parehong gidala sa Cebu City Medical Center.

Matud pang Caumiran nga igo nalang nakahunghong si Regner sa pangalan nga "Alex muslim" ug nagsuka na kini og dugo ug wala na makatingog.

Gisubay pa karon sa kapolisan ang motibo sa pagpamusil, nasuta nga si Regner mianha sa Carbon aron mamalit og mga balayan sa mga kinhason nga gamiton niya sa negosyong shellcraft niadtong tungora.