Shabu gilubong duol sa kapilya sa BBRC

Walo ka paketeng shabu nga gilubong diha sa Bagong Buhay Rehabilitation Center nga nakaplagan atol sa Greyhound operation nga gilusad kagahapon nakapaduda nga wala gihapon mosaler ang paningkamot nga mapalig-on ang seguridad sa maong bilanggoan.

Ang kagamhanan sa senimanang Greyhound operation nakadawat og impormasyon gikan sa usa ka bilanggo nga dunay gilubong nga shabu diha duol sa kapilya sa BBRC.

Dihang gisusi, nakuha ang usa ka dakong plastik nga may sulod nga walo ka paketeng shabu, ang maong plastik wala pa madunot apan si Konsehal Agustus Pe, ang tsirman sa committee on dangerous drugs nagkanayon nga ang impormante miingong dugay na kining gilubong.

Ang pagkadiskubre niini maoy nakapaduda kang Pe nga malutsan pa gihapon ang higpit nga seguridad nga gipatuman sa BBRC sukad sa mga kapalpakang nahitabo diha sa maong bilanggoan pila na ka bulan ang milabay.

Dunay gibutang nga mga Barangay Intelligence Network (BIN) sa Criminal Investigation and Intelligence Branch ug mga K9 Units diha sa gate niini aron maoy mangukay sa mga gidalang pagkaon sa mga bisita.

Nunot niini dunay himuong imbestigasyon ang BBRC ug si Pe aron pagtino kung giunsa pagkalusot sa maong drogas ug ingon man kung si kinsa ang tag-iya niini.

Show comments