Tigbakay sulod sa tunghaan

Dakong supak ang mga opisyal sa edukasyon sa Minglanilla sa sugyot nga himuong tigbakayan sa manok ang ilang eskuylahan sa lungsod karong piyesta sa Agosto 22.

Giuyonan usab kini ni Mayor Eduardo Selma kinsa nakamatikod nga dili maayo ang plano sa opisyal sa Department of Agriculture DA sa lungsod nga si Chris Bajo.

Sayo niini gisugyot ni Bayo matud pa sa mayor nga adto ipahigayon ang tigbakay sa Minglanilla Central School karong piyesta.

Kini sa tinguha ni Bajo nga daghang sugarol ang modugok og mamalit sa iladlad nga mga produkto sa kaumahan sa palibot kay may agri-fair man silang himuon.

Apan gibatig kahimangod ang ubang mga magtutudlo pagkasayod nga ang lugar nga umolanan sa pangutok ug kinaiya sa bata aron dili magdako nga sugarol, himuon na hinuong tigbakayan.

Kasagaran sa mga magtutudlo nga naglikay sa pagbutang sa ilang ngalan nahaigking ug nakurat tungod kay wa sila magdahom nga ang mga talahurong opisyal sa lungsod mopagamay sa ilang respeto sa eskuylahan.

Bisan tuod og way klase sa maong adlaw, apan dili kalikayan nga masilsil sa alimpatakan sa kabataan nga ang sugal maayo kay gani hastang ilang eskuylahan gamiton man nga tigbakayan.

Alang sa ubang mga magtutudlo usa ka sagradong dapit ang eskuylahan sanglit dinhi bairon ang tuok ug kinaiya sa bata aron sa ilang pagdako buotan silang lungsoranon.

Ang sugal basi sa balaod dili maayong itudlo sa kabataan apan sa plano sa kadagkoan sa gobiyerno sa Minglanilla mao rag silay nagtudlo sa mga estudyante aron kini mahimong ngilngig nga sugarol sa umaabot nga mga adlaw, matud pa sa mga magtutudlo.

Gumikan niini gisanta ni Selma ang laraw ni Bajo ug mangita na sila og laing dapit alang sa tigbakay.

Matud pa ni Selma nga dili maayo nga himuong sugalan ang eskuylahan.