29 ka polis relibohan

Girelibohan sa ilang pwesto ang 29 ka mga polis gikan sa Cebu City Police Office, Provincial Police Office ug sa Mandaue City Police Office.

Sagad sa mga girelibohan gikan sa CCPO ug ang lima lakip sa gipanghinganlan sa usa ka gidudahang drug pusher nga tigdawatan kanila og suborno.

Sumala pa sa order gikan sa Regional Personnel Human Resource Development Division sa Police Regional Office 7 nga ibutang ang 29 ka girelibuhang polis diha sa Service Security Group sa rehiyonal nga buhatan sugod kagahapong adlawa.

Wala hinuon ibutang sa order kung unsay rason sa ilang pagkabalhin apan pipila kanila ginganlan ni Gloria Regis ang asawa ni Epifras Regis alyas Tatay Pepe tigdawatan og suborno gikan nilang magtiayon kaniadto.

Ang rebelasyon ni Regis nakapaukay sa mga kadagkuan PRO7 ug mimando og imbestigasyon sa kalihukan sa maong mga polis.

Si Gloria Regis daling mibakwi sa iyang pagtug-an ug mipasangil nga wala siya'y gitug-anang sakop sa media gawas lang nga iyang giangkong ilang mga higala ang maong mga polis ug iyang hatagan og pang-load sa cellphone, pang gasolina ug uban pa agi og pamarayeg.

Si Epifras Regis maoy gitumbok nga labing idlas nga bigtime drug pusher dinhi sa Metro Cebu gumikan kay sukad sa pagsulod niini sa negosyo sa drogas wala pa kini madakpi sa mga polis.

Nadakpan ang magtiayong Regis uban sa ilang driver niadtong milabay'ng buwan diha sa usa ka pension house sa dakbayan sa Lapulapu ug nakuhaan og binultong mga shabu ug linibong kwartang gituuhang halin sa drogas.

Sa 29 ka mga girelibuhang polis 22 kanila gikan sa CCPO usa kanila opisyal, duha sa MCPO ug lima usab gikan sa CPPO diin ang usa kanila gihinganlan usab ni Gloria Regis sa iyang rebelasyon nga midawat og P500,000 agi'g suborno aron di dakpon iyang anak, gibakwi usab ni Regis ang maong rebelasyon.