3 ka Tsino gisikop kay namaligya pekeng cellphone tabangan -BID7

Ang Chinese Consulate dinhi sa Sugbo mihimo na og lakang sa pagtabang sa tulo ka Chinese national nga nalambigit sa pagpangilad gamit ang pekeng cellphone dinhi sa dakbayan.

Matud pa ni Bureau of Immigration and Deportation-7 Regional Director Geronimo Rosas si Chinese consul general Cui Luosheng sa People's Republic of China dinhi sa Sugbo mimando kang Antonio Ho, presidente sa Amity Club, usa ka organisasyon sa mga Tsino dinhi sa Sugbo nga maoy moatiman sa kaso sa tulo ka Tsino.

Ang tulo nasikop sa mga awtoridad gumikan sa pagpangilad ug anaa karon sa kustodiya sa BID-7.

Matud pa ni Rosas nga dako ang iyang pasalamat sa gihimo nga lakang sa consul general gumikan kay makapawagtang kini sa iyang kabalaka samtang napriso sa ilang buhatan si Lun Xu, Ri Luang Xu ug Hua Xing Xu human kini gi-turnover sa CIDG-7 ngadto kanila ang kustodiya niini.

Atol sa paghatod sa mga sakop sa CIDG-7, kini mipadayag nga dili sila makapasaka og kaso batok sa maong mga suspetsado gumikan kay walay interes ang Samsung nga mopasaka og kaso batok kanila hinungdan sa pagduso niini ngadto sa BID-7.

Matud pa ni Rosas nagpaabot sila og lain pang mga reklamante batok sa tulo alang sa dugang kaso nga ipasaka gawas sa kasong estafa nga gipasaka ni Atty. Franklin Camasura nga usa sa biktima sa pagpangilad ni Lun Xu.

Dunay laing usa ka Narciso Kitalig Sr. mitunga sa ilang buhatan aron sa pagreklamo apan mitataw nga dili mopasaka og kaso kun mahatag sa usa sa tulo ka Tsino ang P2,500 nga nakuha niini sa pagpangilad.

Kun mahinayon nga ikustodiya sa Chinese Consulate ang tulo ka mga Tsino, dili ihatag sa BID-7 ang mga dokumento niini samtang nagpadayon pa ang kaso batok kanila ug moluwat kini og hold departure order batok sa mga suspetsado aron dili kini makaikyas paggawas sa nasud.