Cebu bagsakanan kinarnap

Gibutyag ni Commission on Human Rights Commissioner Dominador Calamba nga dinhi gipangbaligya sa Sugbo ang mga kinarnap nga mga sakyanan gikan sa Mindanao.

Si Calamba kinsa miadto sa buhatan sa Criminal Investigation and Detection Group kagahapon mitug-an nga duna siya'y gihuptang warrant of arrest batok sa usa ka ginganlan lang og "Monching" nga taga dinhi sa Sugbo.

Gikatahong kini si Monching maoy gibutyag sa usa ka gidudahang carnapper didto sa General Santos City nga giilang si Alimbusar Ali kinsa nadakpan dihang ilang gikarnap ang sakyanan sa usa ka opisyal sa militar pipila na ka bulan ang milabay.

Sumala pang Calamba nga gibutyag ni Ali nga si "Monching" maoy ilang buyer nga taga dinhi sa Sugbo nga dunay display center diha sa dakbayan sa Lapu-Lapu.

Kagahapon mianha si Calamba sa CIDG7 aron pagkuha sa sakyanan nga Mitsubishi Adventure nga gipanag-iya sa iyang asawa nga gikarnap niadtong Enero 2004 didto sa Davao city ug na-intercept sa mga sakop sa Traffic Management Group 7 ug CIDG7 diha sa dalan Gorordo niadtong Agosto 7 ning tuiga.

Ang maong sakyanan galaxy blue ang kolor giusab na ang pintal diha sa ubos, gitangtangan og carrier sa atop ug ang hagdan diha sa luyo padulong diha sa atop.

Natiman-an pa ni Calamba ang sticker nga gipapilit niini diha sa gasolinahan nga may markang diesel ug hulagway sa usa ka batang daw nangihi.

Matud pang Calamba nga iyang kasuhan ang mga sakop sa TMG sa Mindanao nga mitugot nga marehistro kini bisan na-tamper na ang serial number sa chassis ug makina niini.

Si SPO2 Noel Seno ang car theft expert sa CIDG7 nagkanayon nga sa ilang pagsubay mitumaw nga gikan kini sa usa ka ginganlan og Marcelo Cabahug sa dakbayan sa Mandaue.

Gawas sa maong sakyanan, duna pay usa ka Isuzu Highlander nga gipanag-iya sa kompanya'g prutas sa Polomolok North Cotabato ug usa ka Toyota Revo nga gipanag-iya sa usa ka negosyante nga gi-turn-over kagahapon ngadto sa ilang mga tag-iya ug insurance company.

Sama sa sakyanan ni Calamba, ang duha ka laing sakyanan nasubay usab nga miagi kang Cabahug base sa mga dokumentos nga nasubay sa CIDG gikan sa mga tawong nakapalit niini.

"Kasi yung mga documents nga na-recover namin nag-link sa pangalan ni Cabahug," asoy pang Seno.

Gikatakdang mopasaka og kasong carnapping ang CIDG batok kang Cabahug karong mosunod nga mga adlaw samtang gisubay na ang ubang mga dokumentos sa 12 pa ka SUVs nga nasakmit sa CIDG7.

Kagahapon gihatagan og pasidungog ni Calamba ang hepe sa CIDG nga si Sr. Supt. Jorge Corpuz ug si SPO2 Seno samtang hatagan usab og linaing pasidungog ang TMG 7 gumikan sa ilang operasyon.