P2.9M ihatag sa bukirang barangay

Mopagawas og P2.9 milyones ang kagamhanan sa dakbayan sa Sugbo aron ihatag sa 29 ka mga barangay nga nahimutang sa bukirang bahin dinhi sa dakbayan aron duna kiniy magasto sa mga himoong kalihukan may labot sa nagsingabot nga Asean Summit nga ipahigayon dinhi sa Sugbo karung bulan sa Disyembre.

Si Association of Barangay Council (ABC) President Eugenio "Jingjing" Faelnar maoy nipasar sa resulosyon atol sa sesyon sa konseho kagahapon aron mapagawas ang maong pundo nga adto kuha-on sa Pagcor funds.

Si Mayor Tomas Osmeña maoy nidasig sa mga opisyal sa bukirang barangay nga mopahigayon og bisan unsang mga kalihukan sa ilang tagsa tagsa ka barangay atol sa pagpahigayon sa Asean Summit unya sa petsa 11 hangtud sa 14 sa bulan sa Disyembre.

Tumong ug tuyo niini sa mayor aron malingaw ang mga molupyo sa nahisgutang mga lugar ug dili na kini makahunahuna sa pagsuroy dinhi sa dakbayan.

Ang mga barangay nga gipaabot nga makadawat og tag P100 mil gilangkoban kini sa mga barangay sa Adlaon, Agsungot,Bacayan, Babag, Binaliw, Bonbon, Budlaan, Buhisan, Buot Taup, Busay, Cambinocot, Guba, Kalunasan, Lusaran, Mabini, Malubog, Pamutan, Paril, Pulangbatu, Pung-ol Sibugay, Sapangdaku, Sinsin, Sirao, Sudlon-I, Sudlon-II, Tabunan, Tagbao, Taptap ug Toong.