Tedy nasuko sa NHA sa langay i-release ang P100M

Dili motuo si Mandaue City Mayor Thadeo Ouano sa miaging State of the Nation Address ug sa planong pagmugna sa super region ni Presidente Gloria Macapagal Arroyo.

Kini hangtod nga ipagawas na ang iyang gisaad nga P100-milyones nga pundo alang sa medium, rise housing project sa Looc nga papuy-an sa kapin sa 400 ka pamilya nga nasunugan.

"How will the public believe that the super region plan of the President will succeed if even this P100-million funds long promised has not materialized," nagkanayon si Ouano.

Si Arroyo mibisita sa dakbayan sa Mandaue niadtong Nobiyembre 8, 2003 ug nanghatag sa titulo sa yuta sa mga benepisyaryo sa New Resettlement Housing Project sa Canduman.

Mihatag usab si Arroyo sa P1-milyon nga tseke alang sa kooperatiba sa urban poor.

Dungan niini, gimanduan ni Arroyo si kanhi Housing Secretary Michael Defensor sa pagpadali sa pagpagawas sa P100-milyones nga pondo alang sa nahisgutang katuyoan.

Apan bag-ohay lang nga naningil ang National Housing Authority sa dugang dokumento nga gikinahanglan aron mapagawas ang maong pundo.

Giklaro ni Ouano nga naduso na nila ang tanang dokumento apan gilangan-langan sa NHA.