2 ka bata nag-bangka gipamusil

Duha ka minor de edad nga nagluwan sa bangka kalit lang gipamusil sa miaging gabii sa Yansport Shipyard sa Cabahug Private Wharf sa Opao, Mandaue.

Ang duha giila nga sila si Rickson Bacalso, 16, ug Roy Armamento, 17, nga pulos nagpuyo sa sitio Kalipay, Opao, Mandaue.

Ang gikatahapang namusil sa mga biktima mao ang wala mailhing guwardiya sa barko nga gibaradero sa maong dapit.

Sa nasayran sa Banat News kang PO2 Vicente Gila nga nagluwan lamang ang mga biktima sa ilang bangka ug nahiagi duol sa gibaradero nga barko sa maong dapit ug kalit lang gipamusil.

Nagtuo sila si PO2 Gila nga gituohang mga kawatan ang mga biktima nga magluwan og bangka nga maoy hinungdan nga gipamusil.

Dugang pa nila nga himuon pa nila ang dugang pakisusi sa pag-ila sa mga namusil sa mga biktima alang sa tukmang lakang nga ilang himuon.

Ang duha nga nakabaton og mga samad sa pinusilan sa ilang bukobuko gidala sa Vicente Sotto Memorial Medical Center sa dakbayan sa Sugbo ug padayong giatiman sa mga doktor.