Si Sanchez kinsa maoy nagpadagan ug nagdumala sa mga estasyonan sa Sayam Broadcasting Corporation dinhi sa Visayas nga mao ang DYDD sa Metro Cebu, ug sa duha ka "relay station" niini sa Bogo, Cebu ug Guihulngan, Negros Oriental, miingon nga mitak-op sila sa ilang serbisyo sa panibya sukad pa niadtong Domingo, Hulyo 31, kay mobalhin silag lugar nga tarokan sa ilang transmitter.
Ang ilang kasamtangan makinarya sa transmitter anaa itarok sa yuta ni Osmeña sa Lapu-Lapu City.
Apan kutob nalang sa Hulyo 31, 2006 ang ilang kontrato sa paggamit sa maong luna, hinungdan nga laroton na nila kining maong mga kahimanan aron ibalhin sa dapit sa habagatang bahin sa Metro Cebu.
Busa miingon si Sanchez nga dili si Osmeña maoy nagpahunong sa ilang sibya kundili siya mismo si Sanchez agig pagtamod sa kasabotan ug kontrato nga ilang gipirmahan ug gikauyonan sa sayo pa.