Koreanong paresan mikuha's basurahan misukol sa mga polis

Koreano mikarate sa mga mirespondeng polis sa Mandaue human kini masuta nga maoy mikawat sa garbage bin sa dakbayan sa milabay'ng hapon.

Ang magtiayong Koreano nga nailang sila si Han Hyun Gyu, 51, ug Song Chun Ja, 40, nga temporaryong nagpuyo sa dalan A.S Fortuna, Bakilid, Mandaue maoy gitumbok sa kapolisan nga mikuha sa garbage bins sa siyudad.

Base sa imbestigasyon ni PO1 Alfredo Andales sa Station 2 sa Mandaue City Police Office nga usa ka Winston Almacin empleyado sa Department of General Services sa Mandaue mitaho sa kapolisan human iyang nakita ang tulo ka mga garbage bins sa dakbayan nga anaa sa panimalay sa magtiayong Koreano.

Matud pa ni Almacin nga buot unta niyang kuhaon ang maong mga basurahan sa panimalay sa Koreano apan nagmakuli kini gumikan kay gisudlan kini nila sa tubig hinungdan sa pagpangayo og assistance sa kapolisan sa Sation 2 ug Station 4 sa MCPO.

Atol sa pagresponde sa kapolisan nagmagahi gihapon ang magtiayon ug misukol pa hinuon ngadto sa mga polis.

Si PO3 Gregorio Sabal sa Station 4 nahiagum og samad kinarwasan gikan ni Ja samtang si SPO1 Enolpe sa Station 2 gikarate ni Gyu.

Gisikop ang magtiayon ug gitanggong sa kapolisan sa Station 2.

Matud pa ni PO1 Andales nga pasakaan ang magtiayong Koreano og kasong pagpangawat, direct assault ug physical injuries ngadto sa piskaliya sa dakbayan sa Mandaue.

Si Mayor Thadeo Ouano sa Mandaue misaad nga maoy mangunay og pasaka sa kaso batok sa magtiayon aron ipakita ang iyang kaseryoso pagprotehir sa mga garbage bins sa dakbayan.