Tindero'g balot patay sa dam-ag

Namatay ang usa ka balot vendor human mabiktima sa hit-and-run nga sakyanan, apan nadakpan dayon sa kapolisan ang drayber nga mipabulhot og padagan human sa aksidente niadtong miaging kaadlawon sa Matab-ang, Toledo.

Si Alberto Borja Mangubat, 30, taga Sitio Sta. Ana, Pardo, dakbayan sa Sugbo nadasmagan sa Isuzu Forwarder nga may plakang GHA 258 nga gimaneho ni Jose Apable Toledo, 38, taga Camanseles, Talavera, Toledo.

Si SPO3 Celso Dagala, hepe sa traffic section sa Toledo nagkanayon nga si Mangubat gikan sa Balamban nga namaligya balot sa dihang nadasmagan sa delivery truck samtang nagmaneho sa iyang biseklita sa subidahon nga dalan.

Maayong pagkalagpot ni Mangubat gumikan sa impact atol sa pagkadasmag.

Mipasutoy unta og padagan si Toledo sa iyang gimanehong sakyanan, apan gigukod kini sa mga polis hinungdan nga nasikop kini nilang SPO1 Anacleto Young ug PO3 Cris Gako.