Mga Pinoy OFW sa Lebanon hakuton gawas sa gubat

Miluwat kagahapon og kamanduan si Presidente Gloria Macapagal Arroyo sa pagpabakwit sa mga Filipino nga tua sa Lebanon.

Si Executive Secretary Eduardo Ermita ug Foreign Affairs Secretary Esteban Conejos mibutyag nga 200 ka Filipino ang unang ipabakwit gikan sa Lebanon.

Ang mga Filipino mag land travel paingon sa Damascus sa Syria dayon sa Dubai para makasakay og flight balik sa Manila.

Sayo niadtong Huwebes si Gilbert Asuque tigpamaba sa Foreign Affairs mibutyag nga ang kakuwang sa pundo maoy nakababag sa gobiyerno sa pagpangita og luwas nga maagian sa 30,000 ka Filipino kinsa nagpuyo sa Lebanon.

Si Rosalinda Baldoz administrator sa Philippine Overseas Employment Administration (POEA) mitataw nga gi-ban nila ang deployment sa mga workers sukad niadtong Huwebes sa milabay'ng semana.

Si Baldoz nagkanayon nga bisan ang mga recruiters maglisod og padala og mga workers sa Lebanon tungod kay ang airport sa maong lugar maoy usa sa giigo sa pagpamomba sa Israel.