120 ka balay 'palid sa kusog nga hangin

Ang hanging habagat nga mikusokuso ug milampornas sa bantaw kaayong barangay daplin sa dagat sa Talisay City nakapagusbat og kapin sa 120 ka panimalay, sa barangay Dumlog.

Matud pa ni Kapitan Charles Basillote sa Dumlog, Talisay City nga nagrabehan gyud pag-ayo ang iyang mga molupyo sa tulo ka sitio nga nahimutang sa lapyahan sa dagat.

Gikan niadtong Sabado hangtod Domingo, dihang gibanatan ang maong lugar sa hanging habagat agig duyog sa hinungaw sa bagyong Florita, napayhag ang 121 ka mga panimalay.

Ang maong mga puloy-anan nahimutang sa sitio Litmon, Kagang ug Riverside.

Gumikan sa maong hitabo milihok dayon si Mayor Socrates Fernandez sa pagpadala og mga hinabang pagkaon, biste, ug mga dapat ug materyales sa panimalay, gawas sa hinabang salapi nga gitunol ngadto sa mga nawad-an og pinuy-anang mga pamilya.

Matud pa ni Basillote nga pipila ra hinuon ang hingpit gyung nawad-an og balay dihang gilampornas kini sa dagkong bawod.

Ang nasabak lang sa kusog nga hanging habagat kansang mga bongbong ug atop nanglupad, maoy daghan niining tanang nabiktima sa lapdos sa kinaiyahan, matud pa ni Basillote.

Matud pa sa taga Dumlog nga wa sila makabantay sa kalit kaayong paghapak sa kusog nga hangin ug gani nagtuo na sila nga nahilakip ang Cebu sa gikusokuso sa bagyong Florita niadtong higayona.

Apan dihang milurang na ang maong unos, nasayran nila gikan sa Pag-asa Mactan nga epekto lamang kining tanan sa Inter Tropical convergence zone (ITCZ).