Basurero gipusil patay

Namatay ang usa ka basurero human gipusil sa duha ka tawong nag-motorsiklo samtang naglakaw daplin sa dalan paingon pauli sa ilang panimalay.

Kini nahitabo diha sa Sitio Kasagingan, Lawaan, Talisay kagahapon sa kaadlawon alas 12:30 ang takna.

Patay dihadiha ang biktima nga si Ernesto Aripal, 42, minyo nagpuyo sa susamang lugar, nakaangkon og duha ka samad pinusilan sa luyong bahin sa ulo ug bukobuko agi sa wala pa matino nga kalibre sa armas.

Segun sa report sa kapolisan nasayran nga samtang nag-inusara nga naglakaw ang biktima sa maong lugar pauli sa ilang balay, kalit lang miabot ang duha ka wala mailhing tawo sakay sa motor. Ang angkas maoy mibunot sa dala niining armas dayong pusil ka duha ka mga higayon.

Si PO2 Allan Villasorda sa Talisay Police Station nga nahinabi sa Banat News miingon nga base sa iyang nadunggan nga mga tabitabi sa mga tawo, gidudahan kini nga kawatan sa maong lugar.

"Kutob sa iyang maagian nga dili siya mabantayan sa tag-iya, iya manang dad-on, sumala pa ni PO2 Villasorda.

Ang Homicide Section sa Talisay adunay duha ka mga lalaki nga ilang giimbitar ug gipaubos pa kini sa paraffin test sa kapolisan sa pagmatuod nga nakapabuto ba kini og armas.