Ang insidente nahitabo niadtong tuig 2003 diha sa tunghaang elementarya sa dakbayan sa Talisay.
Si Gemma (ngalan gipugngan) inahan sa 7-anyos nga biktima miduso og reklamo sa korte batok ni Danny (ngalan gipugngan usab) amahan sa classmate sa iyang anak.
Ang anak ni Danny mitug-an kaniya nga gisukmag kini sa anak ni Gemma dihang nagduwa sila sa gawas sa ilang classroom atol sa ilang lunch break hinungdan nga ang asawa ni Danny misulod sa classroom ug gihinganlan og dili maayo ang bata.
Apan si Gemma nahibulong ug giingnan nga husayon nila kung unsay problema sa duha ka bata.
Apan si Danny misulod usab sa classroom ug mikomprontase sa bata ug giprotektahan ni Gemma ang iyang anak.
Si Gemma mipasangil nga ang iyang anak gisukmag ni Danny apan natapi niya kini ug tungod sa maong hitabo siya maoy giatubang ni Danny ug gisukmag sa akusado ang iyang nawong ug nabanda sa bongbong sa classroom tungod sa maong sukmag.
Si Danny mihimakak sa pasangil ni Gemma ug mibawos kini og pasangil nga siya maoy gikawras ni Gemma sa liog.
Ang korte nagkanayon nga ang maong insidente wala maduso sa barangay level ug overprotective lang sa ilang mga anak ang maong mga ginikanan.
Ang mga ginikanan dili angayan nga mag-apil-apil sa away sa mga bata tungod kay ang mga bata mag-uli lang dayon kini sa maayong kabubot-on inig human og away, sumala sa desisyon sa korte.
Gitataw sa korte nga ang giduso nga kaso sa prosekusyon "child abuse" apan ang nahimong biktima sa maong kaso mao si Gemma ug dili ang iyang anak.
Ang magtutudlo sa maong mga bata mitestigo sa korte habig sa prosekusyon apan sa iyang testimonya wala kini mobutyag nga dunay nahitabong maltrato sa bata ug napamatud-an usab kini sa city doctor nga wala siya'y nakitang bun-og dihang iyang gi-eksamin ang bata hinungdan nga gi-dismiss sa korte ang maong kaso.