Mitumaw kining maong laraw human mapusili si PO3 Allan Magalso sa Traffic Group samtang nagtuman sa iyang gimbuhaton nga nanakop niadtong mga drayber nga nakalapas sa lagda sa trapiko sa may dalan Katipunan.
Apan giangkon sa mayor nga maglisud ang maong tinguha gumikan kay dako ang iyang pagtuo nga makasugat kini og pagsupak sa kadagkuan sa kapolisan ug militar.
Apan kun si Osmeña maoy pabut-on angayan gyud nga armasan ang mga traffic enforcers gumikan kay gawas sa pagpatuman sa lagda sa trapiko motabang usab sila sa pagdakop sa mga suspetsado sa mga kaso sa pagpanglabni, tulis ug uban pang krimen.
Giangkon sa mayor nga naglibog siya sa proseso karon nga gisagop sa gobyerno nga ang mga ordinaryong gwardiya sa bisan unsang establisamento nga wala mag-agi og subsub nga seminar kabahin sa paghupot og armas tugotan man kining kargadahan og mga shotgun atol sa ilang duty.
Gipasalig sa mayor nga andam ang dakbayan nga mogahin og pundo aron ipa-ubos sa seminar kun madayon ang tinguha nga kargadahan og armas ang mga sakop sa Citom.
Giklaro sa mayor nga bisan sa mga tanod dako siyang uyon nga isyohan kini og armas ubos sa kondisyon nga ipaubos kini sa subsob nga pagbansaybansay sa hustong mga pamaagi paghupot og armas.