Base sa impormasyon nga nakuha sa Banat News, gasolina nga gipamaligya sa usa ka Gaudencio Quirante nga i-deliver ngadto sa isla sa Kaubian ug Olango maoy gipasanginlan nga hinungdan sa daling pagdako sa kalayo ug pagkatap sa silingang kabalayan.
Matud pa ni SFO2 Ali Casim Espinola, imbestigador sa Cabu City Fire Department nga ila pang susihon ang maong taho ug dako ang tulubagon ni Quirante kun kini mapamatud-an nga namaligya og gasolina.
Si SFO2 Espinola miingon nga gumikan sa kahuot sa mga dalan sa maong dapit maoy hinungdan nga naglisod sila pagpakgang sa kalayo nga milamoy sa 70 ka mga panimalay.
Nadawat sa kabomberohan ang alarma sa sunog alas 5:24 sayo sa kaadlawon kagahapon ug gipaubos kini sa general alarm diin nakontrolar kini mga 20 minutos.
Matod pa ni Espinola nga miangkon si Quirante nga didto nagsugod ang kalayo sa ikatulong andana sa iyang panimalay nga giabangan sa iyang pag-umangkon gumikan kay light materials ang mga panimalay hinungdan sa pagkatap niini ngadto sa mga kasikbit nga panimalay sa maong dapit.
Lakip ang audio-visual room sa Don Bosco - Pasil nakan-an sa kisame niini.
Hinuon walay gikataho nga naangol sa maong insidente samtang gibanabana kini nga dili mominos sa P100 mil ang danyos sa maong sunog.
Samtang si Vivian Nardo sa Department of Social Welfare and Services mipadayag nga ila unang kasamtangan gipahimutang ang mga biktima sa Don Bosco gymn ug mihatag ang kagamhanan og hinabang sa mga residente nga naapektuhan sa sunog sama sa mga gamit sa pagluto ug katulganan lakip na ang pagkaon.