Ang biktima mao si Gaudioso Jaime Bitoon Jr., 16 anyos, ulitawo ug traysikad driver sa nahisgotang dapit.
Si SPO3 Edgar Gomez sa Danao Police Station nga gikahinabi sa Banat News miingon nga naglakaw lamang pauli sa ilang panimalay ang biktima.
Ang wala hiilhing mamumuno nga gituohang nag-atang sa dalan kalit lang mipusil sa bukobuko sa biktima nga milapos sa dughan niini.
Dugang pa niya nga ang mga lumolupyo maoy midala sa biktima sa Danao District Hospital.
Apan ang mga doktor sa maong tambalanan mideklarar gayod nga nakabsan gayod kini sa gininhawa.
Si SPO3 Gomez miingon nga nagpadayon pa ang ilang paghimo og pakisusi alang sa pag-ila sa mamumuno sa biktima aron sa ingon kapasakaan kini nila og kaso.