SRP sentro sa address ni Tom

Ang hingpit nga kahumanan sa konstruksyon sa South Reclamation Project (SRP) ug ang subsob nga pagpangandam sa nagsingabot nga ASEAN Summit nga ipahigayon dinhi sa Sugbo karong bulan sa Disyembre maoy sentro sa State of the City Address ni Mayor Tomas Osmeña atol sa 3rd inaugural session sa konseho sa siyudad sa Sugbo kagahapong adlawa.

Gipahibalo sa mayor ang pag-asikaso na lang sa mga ginagmay'ng trabahuon sa SRP sama sa pagtaud og suplay sa kuryente, tubig ug ang pagtukod og kalsada niini.

Apil sa gituki ang planong paghimo nga sports recreation center sa 90 hektaryas nga Pond A sa SRP ingon man ang 1.4 kilometros nga white beach ug baywalk.

Giasikaso na usab karon ang pagbaligya sa 20 hektaryas nga luna diha sa SRP ngadto sa mga magpapatigayon nga gustong mobubo og puhonan dinhi sa Sugbo.

Samtang gipahibalo sa mayor ang pagsaka og 13 porsiyento sa koleksyon sa siyudad karong tuiga ingon man ang mga programa niining gipatuman pagtabang sa edukasyon dinhi sa dakbayan.