3-mil ka resolusyon, 36 ka ordinansahon napasar sa siyudad

Dul-an sa tres mil ka mga resolusyon ug 36 ka mga ordinansahon ang napasar ug giaprobahan sa konseho sa dakbayan sa Sugbo gikan sa milabay'ng tuig hangtod karon.

Atol sa 3rd inaugural session sa konseho sa dakbayan kagahapon gipahibalo ni Bise Mayor Michael Rama nga gikan niadtong bulan sa Hulyo sa milabay'ng tuig hangtod karong tuiga nakapahigayon og 83 ka mga sesyon ang konseho.

Ang 44 niini mga regular sessions, upat ang special sessions ug 33 ka executive sessions diin mokabat sa 2,962 ang tanang mga resolusyon nga napasar ug giaprobahan niining higayona.

Samtang mokabat sa 36 ka mga balaodnon ang napasar ug nakapahigayon usab ang konseho og 35 ka mga public hearing ug 227 ka committee report.

Usa sa gitumbok ni Rama nga dakong kalampusan nga nahimo sa konseho mao ang nagpadayon karong renovation sa karaang City Hall nga giilisan na og pangalan ngadto na unya sa pagka-Legislative Building.

Subay kini sa gipasar ug naaprobahan nga ordinansa kaniadto ni kanhi Konsehal Manuel Legaspi nga napasar niadtong tuig 2003.

Matud ni Rama tuyo ug tumong sa konseho ug sa administrasyon ni Osmeña aron mapreserbar og balik ang dignidad ug ang heritage sa City Hall Building diin dili lang kini usa ka buhatan kun dili magsilbi usab unya kining tourist attraction sa mga turista nga moanhi sa Sugbo.

Gibutyag ni Rama nga mas labaw karong gitinguha nila nga ma-professionalize ang lehislatura sa dakbayan pinaagi sa pagsagop sa programa nga agenda support, hi-technology, enactment of laws, advancement of legislative staff, and development of capability of councilors and barangay officials ( AHEAD).