Napagan sa 'Frat war'

Gitabangan sa walo ka batan-ong lalaki nga gituohang sakop sa fratenity ang usa ka laing batan-on nga nasaypan nga sakop usab sa kaatbang nga fraternity nga maoy hinungdan sa grabeng bun-og niini.

Nahitabo kini alas 10 pasado ang takna sa miaging gabii atol usab sa kasaulogan sa tinuig nga pangilin sa Tugbongan, Consolacion, Cebu.

Ang biktima mao si Jesson Abong, 22 anyos, ulitawo nga nagpuyo sa maong dapit.

Si PO3 Francisco Parilla sa kapolisan sa maong lungsod nga gikahinabi sa Banat News miingon nga gikan namista sa panimalay sa iyang higala sa maong dapit ang biktima.

Matud pa ni Parilla nga nag-inusarang naglakaw ang biktima dihang paghidangat sa ngitngit nga lugar ang maong wala hiilhing mga batan-on kalit lang mikulata niini.

Ang mga lumolupyo sa maong dapit nakamatikod sa mga lagubo ug pag-agulo sa biktima nga mosagunto sa kasakit hinungdan sa ilang pagsusi.

Nanagan pahilayo ang maong pundok sa mga batan-on ug gibiyaan ang biktima nga nagkadugo na nga naligid sa daplin sa karsada .

Dali nga gidala ang biktima sa Vicente Sotto Memorial Medical Center sa dakbayan sa Sugbo ug padayon pa kining giatiman sa mga doktor.