Gobiyerno gisaway ni Ka Roger

Mga komunistang rebelde miawhag sa kagamhanan kagahapon nga respetohon ang mga civil rights sa ilang mga kauban kinsa maoy gisentro ni Presidente Gloria Macapagal Arroyo sa pagbuhi sa duha ka tuig nga kampaniya batok sa insurhensiya.

Si Gregorio Rosal, tigpamaba sa Communist Party of the Philippines (CPP), nagkanayon nga ang mga suspetsadong miyembro sa rebolusyonaryo hilom nga gipangdetiner ug gi-tortured.

Si Rosal mipasangil nga ang ubang miyembro sa CPP ug NPA gipamatay sa mga sakop sa death squad.

Matud ni Rosal nga ang gobiyerno nagpakatap og mga bag-ong tropa sa mga probinsiya ug sa Manila alang ipatuman ang kamanduan ni Arroyo kabahin sa insurhensiya.

Apan ang mga military ug polis mihimakak sa mga pasangil nga duna silay kalambigitan sa pagpatay sa mga makaliwa.

Si Rosal miawhag sa kagamhanan sa pagpatuman sa prisoner of war status sa mga nasikop nga miyembro sa CPP-NPA ug irespeto ang Universal Declaration of Human Rights, Geneva Conventions ug protocols sa humanitarian conduct of war.

Giawhag usab ni Rosal ang kagamhanan nga buhian si Rogelio Calubad usa sa peace talks consultant sa mga rebelde, Philip Limjoco kinsa kanhi sakop sa NPA ug ang suspetsadong lider sa NPA nga si Roberto Marapo ug Dionelo Borres.