Cybersex batukan — Labella

Mohimo og lakang ang kagamhanan sa siyudad sa Sugbo aron batukan ang nagkagrabing prostitusyon diha sa internet pinaagi sa cybersex nga gikabu-angan karon sa mga batan-on ilabi na gyud sa mga tinun-an.

Si Konsehal Edgardo Labella, tsirman sa committee on laws sa konseho sa dakbayan, mopasar og amended ordinance nga magpalig-on sa kampanya batok sa cybersex nga kinawatkawat nga mahitabo sa nagkalainlaing internet café dinhi sa dakbayan.

Kini human nasuta nga walay ngipon ang City Ordinance C.O.1901 nga nag-regulate sa operasyon sa internet.

Kini tungod kay wala masukip sa probisyon niining maong ordinansa ang pag-ban sa cybersex.

Gipasabot ni Labella nga dihang napasar ug na-aprobahan ang maong ordinansa kaniadtong Mayo 9, 2001 nga iyang gipangamahanan wala pa usab madungog ang cybersex.

Tungod niini, mipasar og amended ordinance ang konsehal aron matubag ang problema sa cybersex dinhi sa dakbayan nga maoy sagad gikabuangan karon sa mga batan-on apil na sa mga tinun-an.

Nasayran nga sagad himuon ang cybersex sa mga internet users sa pribadong lawak diha sa mga internet café dinhi sa dakbayan.