P15M pundo para paglimpyo

Mokabat sa P15 milyones nga kantidad sa ekipo nga maoy manguha sa basura sa mga sapa, kanal ug uban pang agianan sa tubig ang naangkon karon sa kagamhanan sa dakbayan sa Mandaue.

Ang maong ekipo nga gitawag og spider crawler ang gipalit ni Mayor Ouano alang sa hingpit gayod niyang pagpatuman sa kalimpiyo sa dakbayan.

Ang naglakip sa mga dagkong agianan sa tubig nga tinguha sa mayor nga malimpyohan sa mga basura mao ang sitio Maharlika sa barangay Tipolo, Subangdaku, Butuanon River sa Ibabao ug uban pa.

Si City Environmental Officer Engineer Rene Tariman nga gikahinabi sa Banat News ang miingon nga gikan sa Amerikanhong kompaniya nga T.K.C. Heavy Equipment ang Spider Crawler nga gipalit sa dakbayan.

Matud niya nga talagsaon ang spider crawler nga ekipo sanglit makahimo man kini sa pagdagan bisan sa kalapokan sanglit gamiton man ang duha ka tiil kon ang ligid malubong.

Gipasabot niya nga kini maoy paghingpit gayod ni Mayor Ouano sa pagpatuman sa RA 903 kun Ecological Solid Waste Management Act of 2001.