Gipusil, gidunggab human wala mosugot nga balay 'pasuyupan'

Nabulit og samad dinunggaban sa kalawasan ang usa ka 69 anyos nga lalaki kinsa giingong mibalibad sa duha ka manuyupay nga ipagamit ang iyang balay aron sa ilang pagpanuyop diha sa Manga, Mambaling ning dakbayan niadtong milabayng Sabado sa hapon.

Ang biktima giilang si Cesar Cañete,minyo residente sa maong lugar samtang gitumbok nga midunggab kaniya ang usa ka wala mailhing lalaki nga kauban ni Gamariel Gutierez,36, minyo nga taga Tabada sa nahisgutang barangay.

Matud pa sa biktima sa Homicide Section miabot si Gutierez diha sa iyang balay ug mihangyo nga kung mahimo anha sila mosuyop og shabu, apan ang biktima wala mosugot hinungdan nga nasuko si Gutierez ug milakaw.

Dangtan pila ka gutlo mibalik kini uban ang usa ka wala mailhing lalaki. Si Gutierez gikatahong nagdala na og armas ug kalit siyang gipusil apan wala makaigo maong midagan siya pagawas apan gisugat siya sa kauban ni Gutierez ug gidunggab makadaghang higayon sa abaga, dughan ug walang kilid sa lawas.

Human sa hitabo mibiya ang mga suspek samtang si Cañete mipara og taxi ug nagpahatud sa usa ka pribadong tambalanan.

Ang Homicide Section dihang misusi sa maong tambalanan gitunulan sa gwardiyang si Eleto dela Cruz Prudencio og kalibre 38 nga rebolber nga giingong diha narekober sa lawas ni Cañete, gisusi na karon sa kapolisan ang maong insidente ug pamahayag sa biktima.