Nanghinol sa 11-anyos gidakop ug gipriso

Usa ka tawo nga nanghikap sa kinatawo ug dughan sa 11 anyos nga batang babaye gidakop sa kapolisan ug gibalhog sa bilanggoan.

Ang pagdakop sa suspetsado gihimo niadtong miaging gabii sa gipuy-ang panimalay niini nga nahimutang sa Baas-Baas, Pagsabungan, Mandaue.

Ang gidakop mao si Antonio Castillo, 43, nga lumad nga taga Masbate ug temporaryong nagpuyo sa maong dapit.

Ang nagdakop kang Castillo mao sila si Elvin Baricuatro ug Edito Montecillo nga mga barangay tanod sa Pagsabungan.

Gihimo ang pagdakop sa suspetsado dihang ang 11-anyos ang nahidangat ngadto sa ilang outpost ug gitaho ang pagpanamastamas sa suspetsado.

Gitahan sa mga barangay tanod ang ilang dinakpan ngadto sa kapolisan sa Basak Police Station ug gibalhog kini sa bilanggoan.

Ang biktima nga miasoy ngadto sa iyang inahan nagkanayon nga gipasulod siya sa lawak nga gipuy-an sa suspetsado ug gipanghikap ang iyang dughan ug kinatawo.

Ang kasong act of lasciviousness ug Child Abuse ang kaso nga gihikay karon sa kapolisan batok sa suspetsado.