Oracion maabot sa Domingo

Si Leo Oracion kinsa maoy unang Pilipino nga nakasaka sa Mt. Everest nga labing taas nga bukid sa kalibutan mahiuli na sa Mandaue karong Domingo sa hapon.

Si Konsehal Allan Borbajo nga silingan ni Oracion sa Cubacub ug mao usab ang gitahasan ni Mayor Thadeo Ouano sa pagpangandam miingon nga si Ouano ug mga kaubang opisyal sa dakbayan mosugat kang Oracion sa Mactan Cebu International Airport alas 4 ang takna sa hapon.

Gikan sa tugpahanan, si Oracion molahos sa pagpaingon sa gipuy-an niyang barangay ug sugaton kini sa paghangop sa mga barangay opisyal ug mga silingan niini.

Dugang pa ni Borbajo nga may giandam nga programa ang mga barangay opisyal sa Cubacub nga pagasundan kini sa press conference.

Sa sunod adlaw, Lunes ug adlaw usab sa pagsaulog sa Indepence Day, si Leo Oracion maoy usa sa mga gidapit sa pagtambong sa himuong programa.

Dugang usab sa maong programa ang paghatag og pasidungog ug ang pagtunol ni Ouano sa P25,000 isip cash insentive ngadto ni Oracion.