Ika-163 gitumba sa vigilante

Usa ka gidudahang ex-convict gikan sa Bagong Buhay Rehabilitation Center nahimong ika-163 nga biktima sa gidudahang mga sakop sa vigilante kagahapon samtang ang biktima nagtan-aw og duwa nga dama diha sa daplin sa dalan atbang sa barangay hall sa Tejero ning dakbayan.

Patay dayon gumikan sa duha ka igo sa bala diha sa luyong bahin sa iyang ulo si Neil Borinaga, 28, molupyo sa Villagonzalo 2 sa nahisgutang barangay.

Si Borinaga giingong nalambigit pa gihapon sa mga pagpanglabni sumala pa sa nakuhang impormasyon ni Homicide Section investigator SPO1 Jay Yballe sa pakighinabi sa Banat News.

Sa imbestigasyon ang nag-inusarang suspek nga nagtaptap sa nawong luwan sa usa ka motorsiklong kolor dalag ug itom miabot diha sa gikahimutangan sa biktima.

Ang suspek kalit nga mipusil duha ka higayon samtang kini nagtalikod, wala na madala sa tambalanan ang biktima.

Matud pa nga ang suspek mibahad pa sa mga nagduwa og dama nga dili sila pahilabuton una pa kini mibalik sa iyang motorsiklo ug miikyas padulong sa direksyon sa pantalan.

Ang mga sakop sa Mobile Patrol Group nga miresponde wala na makaapas sa nag-inusarang suspek.

Ang mga kabanay sa biktima naglaraw nga modangop sa Commission on Human Rights sa gidangatan ni Borinaga.

Niadtong milabay'ng semana, ang vice-consul sa embahada sa Estados Unidos nga si Rochelle Wolf nakigkita kang Atty. Alejandro Alonzo, ang direktor sa CHR-7 aron magpangutana kabahin sa pagpatay sa mga sakop sa media, political killings ug sa vigilante killings dinhi sa Sugbo.

Matud pa ni Alonzo, gipahibalo siya ni Wolf nga naalarma na ang U.S. ug ubang mga nasud sa walay kasulbarang pagpatay sa mga ex-convicts dinhi sa Sugbu.

Si JO1 Catherine Cintos mibutyag sa Banat News base sa rekord sa Bagong Buhay Rehabilitation Center nga dunay nasulod nga Niel Gelaga Borinaga gumikan sa kasong pagpangawat niadtong Oktubre 13, 1999, ug nakagawas Oktobre 21, 1999 tungod sa pagka-dismiss sa kaso.

Ang vigilante killings nagsugod niadtong Disyembre 22, 2004.