3 ka back up sa pusher gisubay

Gisubay karon sa Criminal Investigation and Intelligence Branch ang background sa tulo ka mga gitumbok nga back-up sa usa ka gihulagway nga bigtime drug pusher sa dakbayan sa Sugbo nga nakigpinusilay sa mga sakop sa Pardo police niadtong Sabado sa hapon diha sa dalan A.Lopez, Calamba ning dakbayan.

Ang maong mga back-up duha kanila na-discharge na sa serbisyo pagkapolis samtang ang usa aktibo pa gihapon karon ug sakop sa Cebu Provincial Police Office nga gidestino sa usa sa mga dapit dinhi sa lalawigan (dapit gipugngan sa Banat News), ang tulo pulos nagranggo og Police Officer One, ang duha nga na-dismiss giingong gikan sa Cebu City Police Office.

Gisubay karon ni Labra ang background sa maong aktibong polis ug gikatakda kining imbitahan sa Cebu City Police Office ning mosunod nga mga adlaw.

Ang mga sakop sa Pardo police mihimo og buy-bust operation batok kang Anabelle Abellana nga taga Villa Bulsita, Bulacao apan sa Calamba natigayon ang transaksyon diin siya nadakpan ni PO1 Benjie Gan ug pagkapusil sa giingong supplier niini nga si Vivencio Balderamo alyas "Junjun" residente sa maong dapit ug pagkasakmit sa drogas ug armas niini.

Si Gan kinsa gidestino sa Pardo police station alang sa iyang field training program, nakaangkon og dakong gisi sa tuong kilay ug ubay-ubay'ng bun-og sa kalawasan, lakip sa nabun-og mao si SPO1 Glenn Largo kinsa dakong pangos diha sa tampihak duol sa tuong mata ang nahiaguman.

Si SPO1 Largo, PO2 Jonathan dela Cerna PO2 Joel Lacson maoy back-up ni Gan sa maong operasyon.

Sumala pa ni Sr. Inspector Alexis Relado ang hepe sa Pardo Police Station si Abellana midala kang Gan diin misunod ang tulo ka mga kauban niini sa Calamba sanglit diha kini magkuhaan og shabu kang Balderamo.

Nakuha gikan kang Balderamo ang usa ka kalibre 45 pistola, nga may duha ka buhing bala ug duha ka dagkong plastik nga may sulod nga gidudahang shabu. Dali kining gidala sa Cebu City Medical Center apan nagpabalhin sa usa ka pribadong tambalanan.

Dunay migawas nga mga report nga atol sa sinukliay og bala naigo ang usa sa mga back-up ni Balderamo maong dali silang misibog ug gibiyaan ang naulahi.