Firecycles gihimong 'service' – Sanchez

Mga lungsod bawian og firecycle kung masakpan nga ang motorsiklo nga gamiton para sa insidente sa sunog gisakay sakayan lang para sa laing katuyoan.

Si Bise- Gobernador Gregorio Sanchez mibutyag kagahapon nga tulo ka lungsod sa probinsiya sa Sugbo ang nasakpan nga mitang-tang sa mga fire extinguisher sa mga motorsiklo nga gitagana lang sa pagtubag sa insidente sa sunog.

Apan wala gibutyag ni Sanchez ang mga ngalan sa nahisgutang mga lungsod.

Gitataw ni Sanchez nga ang opisyal sa maong mga lungsod nakalapas sa Memorandum of Agreement tali sa kagamhanan sa probinsiya ug angayang bawion ang mga firecycle aron ihatag ngadto sa laing lungsod nga nanginahanglan.

Ang mga kalungsoran sa habagatan ug amihanan sa Sugbo gi-aporan og mga fire-cycle sa probinsiya niadtong buwan sa Marso niining tuiga atol sa pagsaulog sa fire prevention month.

Ang maong mga kahimanan maoy gamiton sa pagtubag sa sunog sa mga lugar nga tua sa bukid ug mga pig-ot nga karsada nga dili masulod sa mga fire trucks ug sama sa mga fire truck ang maong mga sakyanan ipundo lang kini para magamit dayon kung adunay sunog.

Si Sanchez nagkanayon nga magpadala siya og mga tawo nga maoy maniid sa mga kalungsoran nga gihatagan og firecycle kung gigamit ba kini sa laing katuyoan.