3-drayber gipusil sa grahe

Gipamusil sulod sa ilang grahian ang tulo ka drayber sa taksi nga nakaangol sa usa kanila.

Nahitabo ang pagpamusil alas 12 pasado ang takna sa miaging tungang gabii sa Consuelo Village, Basak, Mandaue.

Ang nakabaton og pinusilan sa bukobuko mao si Wenefredo Colina, 35, minyo nga taga sitio Aroma, Subangdaku.

Si Colina kuyog nila ni Edwin Quilaton, 35, nga silingan usab niini sa Subangdaku ug Landi Mondego, hingkod ang panuigon, minyo nga nagpuyo sa Consuelo Village.

Matud pa ni SPO1 Egdar Pasaylo, imbestigador sa kapolisan sa Presinto 3 nga nakagrahe sa gimaneho niining sakyanan si Colina.

Ang wala mailhing mga tawo kalit lang mitumaw gikan sa ilang luyo ug namusil sa makausa lamang ka higayon ug si Colina maoy naigo sa bukobuko.

Dali nga misibat palayo ang wala mailhing mga tawo nga sakay sa motorsiklo ug ang biktima dali usab nga gidala sa tambalanan.