Nagkabaylong patay nabalik na sa pamilya

Pormal nang nahibalik sa ilang tagsatagsa ka pamilya ang mga patay'ng lawas sa mga Pilipino nga napatay didto sa Riyadh, Saudi Arabia nga nagkabayloay dinhi sa Sugbo ug sa Bicol sa milabay'ng semana.

Matud pa ni Amil Arnego, ang memorial assistant sa St. Peter Memorial Homes dinhi sa dakbayan sa Sugbo nga sa milabayng Sabado sa hapon miabot ang patay'ng lawas ni Abel Monterola gikan sa Legaspi City sa Bicol, samtang ang patay'ng lawas usab ni Felix Merando nahibalik na usab ngadto sa iyang pamilya sa Legaspi City.

Ang patay'ng lawas ni Monterola giluwan sa Philippine Airlines nga miabot alas 2 pasado sa hapon sa milabay'ng Sabado sa PAL cargo section sa Mactan Cebu International Airport.

Ang pagpabalik sa patay'ng lawas ni Abel gipangunayan ni Overseas Workers Welfare Administration 7 Regional Director Wilfreda Misterio human sa pagkapalpak sa unang paghatod sa patay'ng lawas ni Merando imbes nga kang Monterola.

Dako ang kalipay sa duha ka pamilya human nahibalik ang maong mga patay'ng lawas ngadto kanila sukwahi sa ilang gibati sa dihang dili mao ang patay'ng lawas nga ilang gihilakan sa dihang unang miabot kini niadtong Mayo uno ning bulana.

Matud pa ni Loraza Monterola asawa ni Abel nga gikahinabi sa Banat News dako ang ilang pasalamat sa OWWA ug Department of Foreign Affairs dinhi sa Sugbo sa pag-abag sa galastuhan sa pagpabalik sa iyang bana ug sa lawas ni Merando balik ngadto sa iyang pamilya sa Bicol.

Si Abel anaa karon gihaya sa iyang panimalay sa Sabang Danao, ang maong balay gikatahong bunga sa singot ug hago nga gipundar niini samtang buhi pa kini nga nagtrabaho sa Saudi Arabia.

Kahinumduman nga si Abel Monterola ug Felix Merando mga construction worker sa Riyadh, Saudi Arabia nga gibanhigan ug napatay sa mga sakop sa Saudi Security Forces human kini maala-i nga mga sakop sa teroristang grupo niadtong Pebrero ning tuiga.