Pugante misurender kay gigutom

Gumikan sa kagutom ug walay mga kailang mitabang kaniya bisan diha sa iyang mga silingan nakadesider na lang sa pagtahan sa iyang kaugalingon ang usa ka pugante sa Bagong Buhay Rehabilitation Center nga miikyas niadtong Biyernes sa kaadlawon.

Si Edgardo Batanes, 26, molupyo sa Ermita ning dakbayan miadto sa balay ni Ermita kagawad Inocencio Rupinta alas 2:30 sa hapon aron pagtahan sa iyang kaugalingon ug ingon man mahuwasan ang iyang kagutom.

Si Rupinta na usab ang misurender kaniya diha sa BBRC, sumala pang Supt. Efren Nemeño ang jailwarden sa maong bilanggoan.

"Gikapoy na lagi kuno siya (Batanes), unya gutom kaayo walay makaon unya bisan taga diha siya wala siguroy mitabang niya kay nakahibalo mang miikyas siya sa BBRC," asoy pang Nemeño sa Banat News sa telepono.

Sumala pa ni Sr. Inspector Inopia sa pakighinabi nga human sa pag-ikyas nilang unom niadtong Biyernes, si Batanes uban nila ni Randy Rayala, Cesar Saban, Emeric Abadiano ug Garsol Gabuya milahos sa bukirang barangay sa Buot-Taup.

Pag-abot nila sa maong bukid pagkahapon nananghid sila si Abadiano, Gabuya ug Saban nga mokanaog sa siyudad aron manulis ug makadala og pagkaon ug kwarta aron magamit paglayas sa dakbayan sa Sugbu samtang si Batanes ug Rayala pahuwaton diha sa ilang gitaguan.

Apan pagbiya sa tulo nakadesider ang duha pagsunod sa siyudad tungod kay wala sila masuhito sa maong barangay. Usa ka dumptruck padulong sa Campo Siyete sa Minglanilla maoy ilang gisakyan.

Gikan didto misakay sila og habal-habal gamit ang nahibiling kwarta padulong sa Tabunok, Talisay diin sila mipalabay sa kagabhion. Sabado sa buntag misakay sila og PUJ padulong sa Pasil diin sila magpahipi diha sa seawall sa Pasil.

Nianang hitaboa giawhag ni Batanes si Rayala sa pagtahan apan giingong wala na siya tagda niini hinungdan nga iya kining gibiyaan ug mibalik sa naandan niyang panginabuhi nga manguykoy og basura dihang wala pa siya masulod sa BBRC.

Dugang pa ni Batanes nga dihay mga karaang higalang basurero ang mitambag kaniya pagtahan na lang sanglit libre ang pagkaon sa BBRC kun itandi sa gawas hinungdan nga nakumbinsir siyang motahan na lang.

Ang BJMP ug kapolisan padayon pang nangita karon sa nahibiling pugante nga si Rayala samtang si Batanes gisagol kang Cesar Saban kinsa niadtong Sabado mitahan ug maoy mitug-an sa gikahimutangan nilang Garsol Gabuya ug Emeric Abadiano.