Si Rubinson Uy, ang presidente sa Cebu Drugstore Owners Association, miatubang sa konseho sa dakbayan niadtong miaging semana ug mibutyag nga supak g'yod sila sa balaod nga maghatag og benepisyo sa mga hamtong.
Matud ni Uy nga paghatag og 20 porsiyento sa mga senior citizens nagkahulogan kini nga usa ka dakung alkanse alang kanila kay ang mabalik kanila mga 32 porsiyento lang ug ipaagi sa tax credit sa gobiyerno.
Iyang gibutyag nga ang kadaghanan sa mga tambal nga ilang mahalin matag adlaw mao ang "maintenance drugs" nga alang sa mga senior citizens og kun ibanan kini og 20 porsiyento, dako kaayo ang ilang alkanse.
Si Konsehal Jocelyn Pesquera mitataw nga ang 20 porsiyento nga diskwento nga ihatag ngadto sa mga senior citizens dili ilakip sa gross sales sa mga magpapatigayon nga mabayran og buhis.
Gitataw ni Uy nga ang sagad moreklamo mao ang mga tag-iya og gagmay'ng botika kay sanglit tinuig ang refund sa kagamhanan nga ipaagi sa tax credit, ug matud niya ma-ut-ot ang puhonan sa mga tag-iya og gagmay'ng botika.
Ang Senior Citizens Law naglatid nga ang mga tiguwang kun mopalit og tambal, mga makaon ug bisan gani ang pletehan sa mga sakyanan, kinahanglang hatagan sila og 20 porsiyento nga diskwento sa ilang ibayad.
Ang mga tag-iya og sakyanan maoy sagad moreklamo sanglit lisud alang kanila ang pag-rekord nga ang usa ka senior citizens nga mosakay kanila nahatagan nila og diskwento.
Si Uy mibutyag nga dunay mga tagdumala og botika sa mga tambalanan nga ang ilang mga presyo sa tambal patungan daan nila og 30 porsiyento sa "catalog price" hinungdan nga bisan og ibanan pa og diskwento sa senior citizens dili sila apektado.
Klaro kaayo nga si Uy nabalaka nga kun mamutang pa sila og mga stickers nga magpahibalo sa mga benepisyo sa mga senior citizens, basin modaghan pagsamot ang mga tiguwang nga mangayo kanila og diskwento.