... Jailguard naeskapohan "naglaslas"

Jailguard sa Bagong Buhay Rehabilitation Center nga naeskapohan sa unom ka mga bilanggo niadtong Biyernes sa kaadlawon misuway og hikog kagahapon sa kaadlawon diha mismo sa ilang barracks sulod sa maong bilanggoan.

Si JO1 Victoriano Vince II gidali og dala sa Vicente Sotto Memorial Medical Center human kini maglaslas diha sa walang pulso gamit ang saming buak.

Matud pa ni BBRC jailwarden Supt. Efren Nemeño sa pakighinabi sa Banat News kagahapon base sa impormasyong iyang nadawat sa mga sakop na-"guilty" ang gwardiya sa nahitabo.

"Naguol lagi kuno 'to siya sa nahitabo kay nauwaw siya nga ang iyang pangalan maoy kanunay'ng gilitok sa mga media nga nakaingon sa hitabo," asoy pang Nemeño kagahapon diha sa Pardo Police station diin gidala ang mga nadakpan og balik nga mga puganteng sila si Garsol Gabuya, Cesar Saban ug Emeric Abadiano.

Giklaro ni Nemeño nga di gihapon malibre sa imbestigasyon ug posibleng kasong ipasakang administratiba si Vince bisan sa gihimo niini.

Daan nang mipasabot si Nemeño nga posibleng mataktak sa trabaho ang maong gwardiya kung mapamatud-ang sad-an sa pagpuga sa unom.

Base sa inisyal nga imbestigasyon wala diha sa iyang pwesto sa tower two si Vince dihang nadiskubrehan sa roving supervisor nga si JO2 Leo Labata nga nabuslot na ang paril.

Ang buslot sa paril tungod kaayo sa tower two apan si Vince sumala pa ni Nemeño diha na makit-i sa tunga-tungang bahin sa tower three ug tower two.