Mamaligyaay'g manok gipusil

Usa ka mamaligyaay og mga manok igtatari ug ubang mga panindang butang ang gipusil sa usa ka wala mailhing tawo diha sa sudlunong bahin sa Lahing-lahing barangay Mabolo ning dakbayan niadtong kagahapon sa kaadlawon.

Ang biktima kritikal nga milandig sa tambalanan giilang si Rene Concepcion, 40 anyos ug molupyo sa Barangay Carreta ning dakbayan.

Sumala pa sa imbestigasyon ni SPO1 Jay Yballe sa Homicide Section base sa gipamulong sa mga residente nga igo nalang sila nakadungog og buto-buto sa armas diha sa gawas samtang sila nag-atiman sa ilang trabahuon sa panimalay sayo sa buntag.

Dihang ilang gisusi sa gawas diha nalang nila nakit-an ang biktima nga nagbuy-od ug dunay mga samad pinusilan sa nawong, dughan ug tuong bukton.

Ang mga mirespondeng polis na og mga sakop sa Emergency Rescue Unit Foundation (ERUF) maoy mihikay nga madala ang nagtinga nga biktima sa Cebu City Medical Center.

Wala pa matino kung unsay gibuhat sa biktima diha sa gikahitaboan nianang mga taknaa nga sayo pa kaayo sa kaadlawon. - Uban sa taho ni John Philip Obera