Reward system suportahan ni Gwen

Suportahan sa Kapitolyo ang lakang nga pagpatuman sa reward system bugti sa impormasyong makuha diha sa mga barangay pabor sa kapolisan ug militar kontra sa mga kaaway sa gobiyerno.

Kagahapon sa buntag si Senior Superintendent Ronald Roderos, Deputy Regional Director for Administration misumitir ni Gobernador Gwendolyn Garcia og report kalabot niini.

Matud ni Garcia nga motukod siya og komitiba nga iyang panguluhan ug ang provincial police director maoy co-chairman samtang duna say papel ang 78th Infantry Battalion kalabot niini.

Si Garcia miaghat sa mga lumulupyo sa matag barangay sa probinsiya nga tabangan ang awtoridad pinaagi sa paghatag og impormasyon nga magamit batok sa insurhensiya.

Magdepende sa ranggo ug krimeng nahimo sa madakpan ang presyong ihatag nga ganti sumala pa sa maong plano.