Ang nasikop mao si Frankie Manubag Deza, 30 anyos, minyo, nga nagpuyo sa Brgy, Labangon dakbayan sa Sugbu ug si Zeny Erpillo Kumasawa, 27, minyo nga lumad sa San Juan lalawigan sa La Union.
Base sa imbestigasyon ni PO3 Manolito Abellanosa sa kapolisan sa Lapu-Lapu nasayran nga miabot sa Lapu-Lapu Police station ang duha ka suspetsado dala ang usa ka babayeng paryente ra usab ni Deza gumikan kay ila kining pasakaan og kasong estafa.
Samtang nagpadayon ang imbestigasyon nakadawat og tawag sa telepono si Insp. Francisco Baguio, hepe sa CIIS kalabot sa duha ka armadong tawo nga luwan sa usa ka pula nga Pajero nga nagdala sa plaka nga AEJ 257.
Pagkahuman sa imbestigasyon sa kasong gipasaka ni Deza ug Kumasawa nagdali silang nanglakaw sa parking area sa kapolisan sa dakbayan sa Lapu-Lapu diin kini gisundan ni Insp. Baguio diin nasigpatan sa naulahi nga ang gialarmang sakyanan mao ang gisakyan sa duha.
Dihang girekisa ang sakyanan usa ka kalibre 45 ang nakit-an duol sa driver's seat nga gibutang sa usa ka clutch bag, samtang laing usa ka armas nakita sa ilawom sa lingkuranan sud sa maong sakyanan .Wala makapresentar si Deza ug dokumento paghupot sa maong mga armas hinungdan sa ilang pagkatanggong.