Matud pa sa kasaligang tinubdan nga sa dihang anaa pa ang kaso sa Mandaue City Prosecutor's office, ang nahisgutang hepe sa kapolisan sa usa ka lungsod sa habagatan nga paryente ra usab sa biktma maoy miluwat og presyo nga P2 milyones alang sa pagbakwi sa kasong gipasaka sa katabang nga 20 anyos nga lumad nga taga lungsod sa Aloguinsan.
Apan niining ulahing kalambuan nasayran sa Banat News gikan sa RTC Branch 56 Clerk of Court sa dakbayan sa Mandaue ubos sa sala ni Hon. Judge Agustin Vestil nga si Atty. Luisito Arma, abogado sa suspetsadong Koreano nga si Yang Bing Yong misang-at og motion to dismiss ngadto sa korte human miluwat og Affidavit of Desistance ang biktima.
Base sa maong tinubdan dili unta mosugot ang biktima apan nakumbinser kini human sa tanyag sa Koreano nga usa ka milyon ka pesos bugti sa maong pagsibog sa kaso.
Matud pa ni Atty. Emeline Bullecer Cabahug, ang branch clerk of court sa RTC 56 nga niadtong Mayo 8 giluwatan sa biktima ang iyang pagsibog sa kasong pagpanglugos nga gipasaka batok sa Koreano inubanan sa abogado sa biktima nga si Atty. Erick Tormis.
Matud pa ni Cabahug nga usa sa hinungdan nganong miluwat og affidavit of desistance ang biktima, base sa iyang affidavit nga nasulbad na ang ilang mga deperensiya ug dili na interesado ang biktima sa pagpasaka og kaso batok sa Koreano.
Ang tinugyanan sa Department of Social Welfare and Development (DSWD) nga nahinabi sa Banat News mipadayag nga andam sila nga motabang sa maong kaso sa usa ka katabang nga gilugos sa Koreano.
Matud pa ni Jaybee Carillo, ang Regional Information Officer sa DSWD nga aduna silay mga pasilidad nga makatabang sa biktima sa iyang insaktong seguridad, apan kinahanglan pa nila kini mahinabi personal ang biktima aron masuta kun wala bay mga kakulian o hulga sa maong pagluwat og affidavit of desistance.
Karong adlawa tukion sa korte ang motion to dismiss nga gipasaka sa abogado ni Yang sa sala ni RTC Branch 56 Judge Agustine Vestil mga alas 2:30 sa hapon.
Base sa reklamo sa 20 anyos nga babayeng katabang sa panimalay nga niadtong Abril 5 ning tuiga mga alas 3 sa kaadlawon si Yang milugos kaniya sulod sa iyang lawak human sundi sa suspetsado human kini miabli sa pultahan kuyog ang amo niini nga hubog.
Human sa maong insidente nakatulog sa lawak sa biktima ang suspetsado diin naabtan pa kini sa mga mirespondeng polis sa station 2 sa kapolisan sa MCPO human ang biktima mitaho sa iyang paryente pinaagi sa pagtawag sa telepono ug ang paryente na maoy nagpahibalo sa kapolisan.