Mandaue drivers padayong lahos sa uptown ug Colon

Wala mahadlok ug gipadayon gihapon sa mga PUJ drayber sa Mandaue nga rota ang ilang pagpamasahero lahos sa uptown ug Colon area dinhi sa dakbayan sa Sugbo bisan pa man og gimando na ni Mayor Tomas Osmeña ngadto sa City Traffic Operations and Management (CITOM) ang pagpatuman sa City Ordinance 1837 ug amended Ordinance 2072.

Gibutyag sa presidente sa Nagkahiusang Driber sa Sugbo (NADSU) Antonio Pogado nga dili sila mahadlok ug padayun gyud nilang pakigbatukan ang maong ordinansa.

Gani gibahad ni Pogado nga subli gihapon silang molusad og rally dala ang ilang mga yunit diha sa buhatan sa Citom sa may N. Bacalso Avenue ug sa Cebu City Hall kun makita nila nga hingusgan sa siyudad ang pagpatuman sa maong mga ordinansa.

Nasayran nga nakahatag og suliran sa trapiko diha sa N. Bacalso ang rally sa mga PUJ drayber diha sa gawas nga bahin sa Citom ug Cebu City Hall nga milanat og kapin sa oras.

Apan giangkon ni Pogado nga medyo niminus gyud ang biyahe sa mga PUJ unit sa Mandaue Jones nga rota tungod kay gibati na og kahadlok ang mga operator niini.