Matud pa ni Supt. Lyndon Lawas, hepe sa Firearms and Explosives department sa kapolisan sa rehiyon, nga karong Hunyo mopahigayon ang iyang buhatan og mga seminar ug pagbansaybansay sa mga security guard ug sa mga opisyal sa nagkalain-laing security agency ning siyudad.
Ang tuyo niini mao nga mabantayan usab sa mga security guard sa mga malls, hotel, restaurant ug nagkalainlaing business ug industrial establishment nga posibleng suroyan unya sa mga delegado sa Asean.
Kining mga lugara dako kaayo og mahimo ang security guard sa pagtino nga iyang palibot matag karon ug unya luwas sa mga peligro.
Matud pa ni Lawas nga ang mga kapolisan ug militar may perminanteng loyalidad sa balaod ug sa Pamuno nasud.
Apan tungod kay limitado ra ang ilang gidaghanon, busa idugang dinhi ang dakong mahimo sa suportang ihatag kanila sa mga guwardiya sa mga lugar nga suroyan unya sa mga delegado.
Miabot sa hunahuna sa mga otoridad sa kapolisan kining maong plano dihang nasuwayan nila ang maayong gikatampo sa usa ka security guard sa SM dihang misangpit dayon kinig mga polis pagkadiskobre niya nga may kabalak-ang kahon nga gibilin sa duha ka wa hiilhing tawo, duol sa terminal sa mga PUJ niadtong Huwebes sa gabii.
Gumikan niini nasuta sa kapolisan nga miyembro sa grupong terorista ang mibilin sa maong mga bomba dihang namatay kini kay nakig-engkwentro sa kapolisan.
Matud pa ni Lawas nga ingon niini ang kamahinungdanon sa mga security guard ilabi na karong umaabot nga summit.