'Stalker' ni Gwen gidakop

Usa ka lalaki nga gidudahang "stalker" ni Cebu Governor Gwendolyn Garcia ang gidakop sa usa ka sakop sa Regional Mobile Group gumikan sa kadudahan niining lihok diha sulod sa usa ka bus pasaheroan nga padulong sa lungsod sa Tabuelan diin ang gobernador mibisita kagahapon sa buntag.

Si Romeo Pelayo Ariso, hingkod ang panuigon nga taga Bogo mibiyahe sa 39 ngadto 40 ka kilometro luwan sa usa ka bus padulong sa lungsod sa Tabuelan kagahapon diin si Gobernador Garcia nag-inagura sa mga proyekto ug mga programa sa maong lungsod.

Si PO3 Wilson Abot mitug-an sa Banat News nga si Ariso gidakop ni PO1 Winston Ybañez gumikan kay kadudahan ang lihok niini samtang luwan pa kini sa bus nga Pesiao Bus Lines nga gisakyan usab sa naulahi nga padulong mo-duty sa Tabuelan isip augmentation sa Regional Mobile Group sa nahisgutang lungsod.

Si Ariso nagsuot og karsones nga camouflage susama sa Philippine Army, polo nga kolor puti ug may kurbata pa ug nagpas-an sa iyang bag nga dihang gisusi sa mga polis diha sa police station human imbitaha ni Ybañez may sagbot ug bulingong sinina ug sudlanan sa tubig maoy sulod niini.

Nagtuo si Abot nga posibleng "die hard" supporter o ba kaha fan sa gobernador si Ariso sanglit usa sa mga narekober gikan kaniya mao ang 'leaflet' nga dunay impormasyon sa itinerary sa gobernador diha sa maong lungsod nga may petsang Mayo 11.

Apan sa una nilang pagkakita nagduda silang sakop sa New Peoples Army nga nagpakaaron ingnon ug nagsunod-sunod sa gobernador apan dihang gipailawom sa tactical interrogation matud pa ni Abot 'molikoy' og kalit ang tubag niini.

"Nagduda sad mi niya kay nagsuot man og camouflage nga karsones sa army unya daghan kaayo og dala-dala, pero pag T.I. (tactical interrogation) na sa iyaha mura man og molikoy ang tubag, nalisuan siguro ni siya og pangisip sir," asoy pang Abot.

Gikan alas 10 sa buntag kagahapon gitanggong una ug giimbistigahan sa kapolisan sa Tabuelan si Pelayo ug pagka-alas 3 gikuyogan sa mga polis ang naulahi ug gipasakay og bus nga pabalik sa Bogo.