Muro ami 'siaw sa Santander

Misiaw pag-ayo ang "Muro Ami" nga matang sa panagat nga gitawag usab og "cerosca" sa kadagatan sa lungsod sa Santander.

Ang lokal nga kagamhanan sa lungsod sa Santander ang nipalabang na og ordinansa sa sayong bahin ning tuiga nga nagdili sa maong matang sa panagat.

Kini gumikan kay makaguba kini sa mga gasang nga pinuy-anan sa mga isda sanglit bato man ang gamiton sa "cerosca" aron pagdugmok sa mga gasang.

Nunot niini, gihingusgan na pag-ayo sa Bantay Dagat sa lungsod sa Santander inabagan sa kapolisan ang pagpatrolya sa kadagatan.

Sukad niadtong Domingo, ang Bantay Dagat ug kapolisan sa lungsod sa Santander ang nakasikop na og 15 ka tawo nga nihimo sa maong matang sa panagat nga susama sa Muro Ami.

Niadtong Domingo sa buntag, ang Bantay Dagat nga gipanguluhan ni Tranquilino Boreros ang nakadakop og lima ka mananagat nga sila si Manuel Felosofo, Poring Manulong, Charlito Rondina, Junior Frejoles ug Noli Abrigana nga pulos taga barangay Pasil lungsod sa Santander.

Samtang sa niaging adlaw, napulo ka mananagat ang nigamit gihapon og Muro Ami nga matang sa panagat ang nasikop na usab sa Bantay Dagat nga giubanan ni PO1 Edgardo Pacaña atol sa pagpatrolya sa kadagatan sa may barangay Canlumacad sa maong lungsod.

Ang nangadakpan mao sila si Glenn Russiana, Ronnie Yrad, Reymor Dinopol, Januario Lomotos, Joseph Yrad, Jonathan Binondo, Rosalito Yrad, Leonardo Distrito Jr., Fortunato Dinopol ug Marcelino Yrad nga pulos taga barangay Canlumacad sakop sa maong lungsod.

Gisakmit sa Bantay Dagat ang ilang kagamitan sa pagpanagat lakip na sa ubay-ubay nga isda nga ilang nakuha isip ebidensiya sa pagpasaka sa tukmang kaso.