Si SFO1 Feliciano Miral sa pagpakighinabi sa Banat News miingon nga gipaayo pa nila ang pisa nga nadaot nga maoy nakalangan sa pagpaayo unta niining gihimo.
Gipasabot niya nga ang naguba nilang fire truck maoy dali nga makasulod sa gagmay nga dalan tungod kay gamay man ang tangke niini
Dugang pa ni Miral nga ang kalisod sa ilang pagsulod sa dapit nga nahimutangan sa nasunog nga pabrika sa pabuto mao ang ilang nasinati atol sa pagpawong sa kalayo.
Sa nasayran nga ang trabahante nga si Marina Berdin, 42 anyos, naputlan sa iyang tuong kamot ug maoy gituohang hinungdan sa hinanali niining kamatayon.
Si Hedelisa Batucan, biyuda, nga maoy tag-iya sa maong pabrika ug uban pang trabahante niini ang nakalingkawas dihang ilang namatikdan ang kalit nga pagsilaob sa pabrika tungod sa pagsiga sa Judas belt nga gisansanan og pulbora ni Berdin.
Kahinumdoman nga nabiyuda si Hedelisa dihang namatay ang bana niini niadtong Marso 31, 2003 nga nagkarga og pabuto sa sakyanan ug mibuto dihang natagakan kini sa kalayo gikan sa nag-welding sa skywalk sa Consolacion.
Dugang nasayran nga ilegal ang pagpanggama og rebentador ni Batucan sanglit wala kini maghupot og lisensiya gikan sa gobiyerno.
Si SFO1 Atilano Beredo nga maoy nag-imbestigar sa maong insidente nag-andam na sa mga dokumento alang sa pagpasaka og tukmang kaso batok ni Batucan. – Uban sa report ni Bong Soriano