Ang kidnapping for ransom maoy usa sa gikunsiderar nga bug-at nga krimen ug dunay nagpaabot nga silot kamatayon alang sa malapason niini, apan bisan paman sa gibug-aton sa silot wala gihapon mahunong ang pagpangidnap ilabi na karong tuiga.
Ang deputy chief operator sa usa ka special police task force sa kapolisan nga si Sr. Supt. Prudencio Banas mibutyag sa AFP nga pagtapos ning bulan sa Abril dunay natalang 17 ka mga kidnapping cases.
Sa milabay'ng tuig sa susamang mga bulan nakatala lang og 10 ka mga kaso sa pagpangidnap.
Sagad sa mga gikidnap mao ang mga Indian national nga sagad makita diha sa kadalanan nga magpautang sa mga gagmay'ng mga negosyante.
Apan gumikan usab kay gamay mang magpapatigayon ang mga Bombay gamay ra usab ang pangayuong ransom diha sa ilang mga kabanay nga mokantidad ra og P60,000 ug mabuhian ra dayon sulod sa usa ka adlaw.
Dinhi sa Kabisay-an dili kaayo susama sa kauluhan kagrabe ang kaso sa kidnapping apan pipila palang ka bulan ang milabay dunay duha ka dagkong kidnapping nga nahitabo dinhi sa Sugbu ang usa na niini ang giingong nakaingon sa pagkadakop sa upat ka gidudahang miyembro sa Kidnap For Ransom Gang diha sa tugpahanan sa Mactan Cebu International Airport.
Giingong ilang nabiktima ang usa ka magpapatigayong taga Minglanilla magbase apan didto sa Manila manimuyo, walay napasakaan og kaso sa upat may labot sa kidnapping gumikan kay giingong "nakabuhi" ang biktima ug nakapauli sa iyang mga kabanay.